Հին ու նոր Երևան

Հին ու նոր Երևան

Մեր մայրաքաղաք Երևանն արդեն 2797 տարեկան է։ Այդ մասին են վկայում ուրարտական պալատական կառույցների հորինվածքը կրկնող «Էրեբունի» թանգարանում պահվող գտածոները նշանավոր 3 հնավայրերից` Արին բերդից, Կարմիր բլուրից և Շենգավիթից։

Երևանը տարիների ընթացքում բավականին փոփոխվել է։ Չնայած քաղաքի տարիքին՝ նույնիսկ մինչև 300 տարվա հնության շենք գտնելն այստեղ խնդիր է հանդիսանում։

Ամենահին շինություններից մեկը, թերևս, Երևանի «Կապույտ մզկիթն» է։

Երևանի «Կապույտ մզկիթը» կամ Գյոյ-ջամին 1880 թ.։

Մզկիթն արդեն 250  տարեկան է։ Այն կառուցել է Երևանի կիսանկախ սարդար Հուսեյն-Ալի խանը 1766 թվականին։ Շենքի հարավային դարպասի ճակատին կառուցողը թողել է մի արձանագրություն, որի վերջում հիշատակվում են նրա անունն ու կառուցման թվականը։

«Երևան» հյուրանոցը, որը սկզբում «Ինտուրիստ» էր կոչվում, կառուցվել է Խորհրդային Երևանի առաջին գլխավոր ճարտարապետ, տաղանդաշատ վարպետ Նիկողայոս Բունիաթյանի նախագծով։ Խորհրդային Երևանի առաջին հյուրանոցի շենքը դարձավ 17-րդ դարի ֆրանսիական վերածննդի  ճարտարապետական ոճի առաջին յուրօրինակ հայկական մեկնաբանության օրինակը:

Այժմ՝ «Ռոյալ թուլիփ գրանդ հոթել Երևան» հյուրանոց:

«Կասկադը» 1970-ական թթ․։ Դեռ կառուցված չէ։

«Կասկադն» այժմ ճարտարապետական-կոթողային յուրօրինակ համալիր է, որտեղ կան թանգարաններ, շատրվաններ, ծաղկանոցներ և հարթաքանդակներ։ Համալիրի վերևում գտնվում է Հոկտեմբերյան հեղափոխության 50-ամյակին նվիրված հուշարձան (1967թ.)։

Համալիրի առջևի հատվածում է գտնվում Ալեքսանդր Թամանյանի արձանը։

«Զվարթնոց» օդանավակայանի հին շենքը։

«Զվարթնոց» միջազգային օդանավակայանը բացվել է 1961-ին։ Այն ժամանակ ընդունում էր միայն ներքին՝ ԽՍՀՄ-ի մեջ կատարվող չվերթներ։ 1985-ին օդանվակայանին շնորհվեց 2-րդ կարգ։ Նոր վերջնակայաններ բացվել են 1998-ին՝ Բեռնային համալիրը, իսկ 2007-ին՝ Նոր միջազգային ուղևորափոխադրման վերջնակայանը։ 2002 թ. հուլիսին ՀՀ կառավարության և Կորպորասիոն Ամերիկա ընկերության միջև կնքվեց պայմանագիր, ըստ որի Զվարթնոց միջազգային օդանավակայանը կոնցեսիոն կառավարման հանձնվեց Արմենիա միջազգային օդանավակայաններ ընկերությանը 30 տարի ժամկետով։

Սյուզաննա Թոխունց